- Филозофите од друга страна, кажувале многу со толку малку зборови. Имаме многу да покажеме, а толку малку покажуваме на светот. Во секој минималист се крие една мрзелива личност со големи идеи. Успева да допре до луѓето баш поради тоа заедничко чувство кое го делат. Всушност секогаш поврзаноста на едно дело со набљудувачот е заедничко чувство. Чувство на меланхолија, среќа, вознемиреност. Токму оттука уметноста е субјективна, затоа што авторот е комплексно суштество од збир на сите чувства и емоции кои гледачот ги препознава во себеси. Ги препознава, но не секогаш ги изразува. Сите ние го имаме чувството на мрзеливост, извор од кој доаѓаат изговорите за најголем дел од работите кои сме можеле, а не сме ги направиле, за потенцијалот и идеите кои сме можеле да ги искористиме, а не сме. Како и во животот, и во уметноста прогресот е некогаш поттикнат од уништување и самоуништување. За да биде пеперутката пеперутка, прво мора да е гасеница. Можеби не сме свесни дека понекогаш токму нашата автодеструктивност е само премин кон поголемо ниво на свест, кон нови идеи, кон сосема нов поглед на нештата, на свет кој ни бил пред очи, а сепак невидлив. Во делата се претставени емоционални и егзистенцијални состојби на човек, губење на себеси за повторно пронаоѓање и така во круг, се со цел движење на бесконечниот прогрес – потенцира уметникот.

Методија Јорданоски,завршил ФЛУ во Скопје. Работи како графички дизајнер. Има учествувано во повеќе групни изложби во државата и надвор. Номиниран е финалист на осмиот Интернационален конкурс за студентски плакат, Скопје - Enabled for Disabled .

Изложба „Човек – број“ од Стефан Анчевски

Во Ликовната галерија на ЦК „Марко Цепенков“отворена е изложбата „Човек – број“ од уметникот Стефан Анчевски ( 3.9.- 19.9.2021). Изложбата е поддржана од Министерството за култура.

Уметникот Стефан Анчевски за ликовниот опис на делата со наслов „Човек – број“ вели дека настанале од секојдневието.

-Чекањето на шалтер со бројче во рака е најактуелната форма на нумерирање на луѓето во современиот начин на живеење. Принципот на „земи бројче“ можеби од една страна го олеснува воспоставувањето ред на чекање на шалтери на скоро веќе сите јавни администрации, банки, оператори ит.н. но, од друга страна она „најстрашното“ чекање не е изоставено. Токму тоа е појдовната точка на овој ликовен проект, кој сосема случајно (во тоа бескрајно чекање) почна да се развива за да го анализира човекот како број, поточно да го претвора или само да констатира дека од човековиот идентитет ( единствен матичен број), редниот број во училишниот дневник, бројот на индекс, па се до бројот на чевли, среќен број, број на години, број на шеќер во крвта....... човекот се одредува, т.е. дефинира по случајност на броеви. Меѓутоа, не се работи за констатација, туку за чувство што го добивам секогаш кога ќе се повикам на одреден број – јас се претворам во број или бројот станува „јас“?

Изработените графички решенија се со различни постапки и техники добиени по пат на случајност, без контрола врз една од најконтролираните ликовни техники – графиката. Со одбирањето на ваквата постапка ја надополнив содржината на моите дела – контролирањето и воведувањето ред со броеви на човековото постоење наспроти човековата природа, наспроти она што човекот во својата суштина – е – вели Анчевски.

Стефан Анчевски, дипломирал на Факултетот за ликовни уметности во Скопје при универзитетот „Св. Кирил и Методиј“(2017). Учествува на повеќе групни изложби во земјава и странство и на повеќе ликовни колонии.

Изложба „Позадини“ од Бојана Артиновска Трпческа

Во Ликовната галерија од ЦК „Марко Цепенков“ отворена е изложбата „Позадини“ од Бојана Артиновска Трпческа. ( 6.8 до 24.8.2021)

Посетителите имаа можност да присуствуваат на извонреден уметнички перформанс, односно да се фотографираат со нејзините дела, а кои фотографии понатаму ќе бидат преточени во ново уметничко дело.

Викторија Димеска, историчар на уметност ќе забележи дека уметницата екпериментирајќи со разни сликарски техники и технологија, осознава дека уметничкото и естетското доживување на боите во една сликарска композиција предизвикува илјадници доживувања.

- Љубовта и поврзаноста со портретот како постојан и чест мотив во нејзиниот творечки опус ја охрабруваат да истражува и во полето на фотографијата, користејќи ги подоцна истите фотографии како предлошка за сликани дела или цртеж – вели Димеска.

Уметницата Бојана Артиновска Трпческа вели дека додека ги набљудувала сликите, согледала дека тие преставуваат автономни композиции и идејата за создавање на перформанс (изложба) дошла сама по себе.

-Сакам случајните или намерните минувачи да станат интерактивни учесници и дел од интенцијално дизајниран простор, со цел за момент да се соединат со позадината и да се соочат со себе си, имајќи го на ум сознанието дека ќе бидат фотографирани. Замислата е секој да ја пронајде позадината со која што најмногу се идентификува, односно елементот и просторната димензија со која што се соживува Делата ќе значат продолжување на животот на енергијата која што ја вложувам во нив. Вибрациите ќе продолжат да треперат во секое ново среќавање со делата, со секое ново застанување на разни модели пред платното. Идејта е набљудувачот да постане свесен за сопственото делување и влијание во просторот и времето – вели трпческа.

Отворањето на изложбата беше збогатено со настапите на виолинистката Софија Никоска и солистот Ана Митоска и на актерот Игор Трпчески.

Изложба „19“ од Христина Зафировска

во Ликовната галерија отворена е изложбата “19„ од Христина Зафировска, што е поддржана од Министерството за култура во годишната програма за 2021.(16 7. – 4.8.2021)

Академската сликарка Христина Зафировска, преку својот циклус од 19 дела на тема „Ковид“,на апстрактен и сликовит начин ни го прикажува реалното и невидливото со голо око, поттикнатаод промените на животниот тек, настанати од пандемијата. Целиот серијал од 19 епизоди кои се тесно поврзани меѓу себего интерпретира биолошкиот кружен строеж на вирусот, неговото создавање, виреење, проширување и пренесување.

- Креативните дела од овој циклус се изработени во акрилна техника - мал формат, симболизирајќи ја микроскопската големина на вирусот,кои се надополнети со мали парчиња кои се пробиваат низ површината. Во кружниот, квадратниот и триаголниот простор со мирни потези нанесени се глатки брановидни и испрекинати линии – патот по кој вирусот се движи, а точкастите сегменти иницираат на циркулацијата и ширењето на вирусот. Во секое дело применет е широк опсег на форми со кои авторката ги паралелизираваријациите на микросветот, а таквиот начин на изразување може да се види и во многу претходни нејзини циклуси и изложби....Преку бојата, формата и начинот за визуелно претставување на делата го следиме уметничкиот стил на Зафировска, кој што заслужено може да се категоризира како дел од модернатаапстрактна уметност.. Нејзиниот концентриран фокус покажува кон спремност за експериментирање со нови фантастични облици, кои ќе бидат пандан на фигуративната структура на вирусот кој прерасна во реална закана врз човештвото во 21 век – вели м-р Билјана Галоска за творештвото на Зафировска.

Христина Зафировска работи во полето на сликарството, графичкиот дизајн,мозаикот, ѕидното сликарство, инсталацијата, сценографијата,цртежот, фотографијата и видеото;

Активно учествува на локални и регионални проекти, погранични соработки од областа на културата. Дел е од многубројни проекти, саеми на уметност, симпозиуми, фестивали, работилници, групни претставувања на Балканот, низ Европа и пошироко.

Изложба од Владимир Темков во Прилеп

Во ликовната галерија при ЦК „Марко Цепенков“ во Прилеп отворена e изложба на дела од м-р Владимир Темков, кој пред прилепчани се претставува со 22 дела од циклусот „Бојата на небото и водите во Тиквешијата“.

Академик Блажо Боев за творештвото на Темков забележува дека е вруток на сликартството, како и на сета уметност, наука и филозофија, но пред се на уметноста, најпрвин на нејзините визуелни изблици и дела.

-Темков зборува за убавината на природата на Тиквешијата .Во неговите платна и графики ги изразува искуствата од детство, младост, растење – се до денес. Во сликите се отсликуваат житата, растенијата, онака како ги доживува, вознесено, чудни разубавени, со голема важност. Тиквешијата е инспирација, таа е израз на убавина за Темков, а птиците се посебна тема во неговата уметноста – вели Боев.

Владимир Темков е роден во Кавадарци. Средно уметничко училиште, Педагошка академија и Факултет за ликовни уметности завршува во Скопје, каде и магистрира. Реализирал бројни самостојни изложби во земјата и во странство, а бил дел и од голем број на групни претставувања.

Изложбата „Релации“ од Игор Таневски

„РЕЛАЦИИ“ е изложбата од уметникот Игор Таневски отворена во ликовната галерија. ( 4.06.2021 – 17.06.2021). Гостин во проектот е Филип Ивановски Пепе.

Инсталацијата „Релации“реферира на човековиот однос кон природата и кон животот, воопшто во време на изолација, сепарација и време на карантин каде што запираме на определено време со своите рутински постапки. Инсталацијата се состои од дигитален отпечаток на интервенција во простор, објекти од транспарентна боена пластика или Неколку модели на кооперацијаи полиптих од Филип Ивановски Пепе, кој ги претставува Приказните од нашето секојдневие, изгубената контрола и вредоности во објектите Изгубени работи.

Авторот Игор Таневски вели дека преку експериментирањето со различни технологии и техники при реализирањето на делата се прашува и интересира за прашањата, врзани со елементите, водата, просторната перцепција, како човештвото делува во сегашноста и каква иднина создаваме и, накрај, каков сушност се менува светот...

-Какви релации воспоставуваме едни со други, со природата, во животот, воопшто, секаде во време на паметни технологии и интернет, како пред одредени неопходности... Со визуелно и ликовно истражување во полето на инсталацијата, објектот, сликарството и дигитално обработените видео-фрејмови, уметноста ја доживувам како отворен систем кој константно го шири нашиот спектар за восприемање искуства – вели тој.

М-р Игор Таневски дипломирал на ФЛУ во Скопје. Реализирал неколку самостојни изложби, а добитник е на неколку награди, меѓу кои во 2018 на наградата „Борко Лазески“од ФЛУ Скопје.

Изложба на фотографии „Диего и Фрида, насмевка на половина пат“

Во ликовниот салон отворена е изложбата „Диего и Фрида, насмевка на половина пат“, која опфаќа 95 црно бели фотографии и артефакти преку кои се прикажува универзумот на Диего Ривера и Фрида Кало,уметници, кои се еден од најконтроверзните парови во нивната љубов, а чие влијание ги надминало светските граници. Изложбата, (26.5. – 10.6.2021), ги открива не само взаемната страст на парот Ривера и Кало, туку и нивното заедничко ангажирање во општеството и во политичките збиднувања во тоа време во кое живееа, кои ги овековечиле фотографите Питер Џулс, Гилјермо Самора, Николас Мареј, Едвард Вестон, Мануел Алварес Брава, Гилјермо Кала и Хуан Гусман.

Фотографите ги овековечиле различните етапи од животот на парот, од љубовта и смртта, од нивното венчавање во 1929 година до 1954 г. и смртта на Кало и се отсликува бесконечното согласување и несогласување во првата половина на 20 век во Мексико. Изложбата е исклучителна можност да се запознае преку фотографии волшебната реалност на парoт. Диего Ривера е еден од најзначајните уметници, претставници на мексиканскиот мурализам, а Фрида Кало е позната како творец на автобиографски слики под влијание на народната мексичка и староседелска уметност.

Оваа ексклузивна изложба, ЦК „Марко Цепенков“ ја реализира во соработка со Амбасадата на Мексико во Србија.

Изложба на слики од Ниче Василев

Во Ликовната галерија од ЦК„Марко Цепенков”отворена изложба на слики од уметникот Ниче Василев, кој пред прилепчани се претставува со 22 дела. Изложбата поддржана од Министерството за култура ќе биде поставена до 26 мај 2021.

Творештвото на Ниче Василев според Никола Пијанманов, е секојдневна борба со сивилото на светот. Отворајќи ја денеска, Пијанманов, посочи дека Василев е еден од уметниците кои не мируваат, туку се во постојан грч на креација и осмислување на секојдневниот театар на живот.

-Неговата палета е постојано свежа, а неговиот животен простор континуирано стеснет со премногу дела. ..Уметноста на Ниче е во постојана потрага по совршениот клуч кој ќе ги соедини бојата, светлото и цртежот. Некогаш бојата ја преплавува сликата и триумфира над силуетите, некогаш цртежот ја натсликува бојата со сета своја елеганција и раскош. Оттука маестрално ги користи како медиум пастелите и моливот во боја како што своевремено Едгар Дега ги досликуваше костимите на кревките и нежни балерини со структура на изронети крилца од ноќни пеперутки. Иако првенствено е сликар на човечката присутност, и на ентериерите во кои неповратно се втиснале сенките и формите на женските фигури, актови, еротските облини и погледите на анонимните ликови, нежните и кревки човечки судбини, Ниче Василев е и голем мајстор на пејзажот. Природата во неговите слики трепери не неповторлив начин, синтезата меѓу небото и земјата, тешките бели облаци, тревките на ливадите и ниските ридови во хоризонтот, гранките и меката топла земја на медитеранските полиња, формираат една цела галерија на совршен свет на природата кој човекот полека но сигурно го губи – посочи Никола Пијанманов за творештвото на Ниче Василев.

Ниче Василев Академија за ликовна уметност завршил во Варшава во 1978 година во класата на Лудвиг Мачионг. Во 1971/72 студирал на Националната академија на факултетот за применети уметности во Софија. Член е на ДЛУМ од 1980 г. Живее и работи во Струмица.

Реализирал над 30 самостојни изложби во Македонија и во странство, меѓу кои во Скопје, Струмица, Битола, Штип, Гевгелија, Варшава, Атина, Софија, Анкара, Цирих, Мадрид, Белград...Учествувал на групни изложби и ликовни колонии во земјата и во Бугарија, Послка, Србија, Грција, Франција, Словенија...

Во 2013 година бил на студиски престој во Париз, Франција со Поддршка на Министерството за култура. Добитник е на повеќе награди и признанија, меѓу кои наградата Димитар Пандилов на ДЛУМ, наградата Методија Иваноски Менде на КИЦ, Гран при на Остен - Светска галерија на цртежи во 2013, Уметник на годината 2013 е прогласен во 2014 на Светска галерија на цртежи.