Изложба на дела од колонијата Дрен 2021

Во Ликовната галерија отворена е изложбата на дела создадени на годинашната Ликовна колонија Дрен 2021.( 3.11. до 15.11.2021).

Изложени се над 20 дела, од сликарите Мирослав Живковиќ и Снежана Малетин од Србија, нашите уметници Мирјана Крстева Масети, Александра Петкова – Џианели, Буба М. Солак, Драган Најденовски, Новица Трајковски, Тони Чатлески, Стефан Малбашиќ и скулпторите Слободан Милошески и Марјан Стојаноски.

Ликовната колонија Дрен 2021 се одржа со финансиска поддршка на Министерството за култура.

Досега на колонијата, во изминатите 13 години, се создадени околу 350 дела кои се во трајно наследство на Центарот и на државата.

Годишната изложба на ДЛУП 2021

Изложбата на дела од членовите на ДЛУП, поставена во ликовниот салон на Центарот (8.10 до 31.10.2021) предизвика интерес кај љубителите на уметноста, кои имаат можност да ги проследат делата од Методи Исков, Елена Димоска, Верче Николоска, Давид Атанасоски,Александар Џинго, Марта Макеска, Маја Најдоска, Ангелкa Башеска, Александра Богоеска, Павлина Илијоска, Анита Сотироска, Бојана Артиновска, Емил Солески,Ферди Булут, Кристина Малинческа, Марија Ѓорѓиоска, Славчо Павлоски, Филип Перески,Драган Верговски Алпи, Васил Костов, Михајло Ристески и Златко Крстески.

Претседателот на ДЛУП Методи Исков вели дека е презентирано едногодишното творештво на членовите на Друштвото.

Изложба на дела од Мирко, Лидија и Марко Вујисиќ

Изложба на дела од семејството Вујисиќ е отворена во Ликовната галерија на Центарот. ( 8.10 – 31.10.2021).

Изложените дела од Лидија Вујисиќ се во цртачка техника во пастел и се дел од циклусот „Ние во огледала“, на кои се претставени ликови од музката, актерството и ликовната уметност.

Делата од Мирко Вујисиќ воспоставуваат комуникација од чудесниот свет на внатрешни простори, мирејќи ги со префинетите цртачки структури и менталната предлошка, кои директно ја допираат светлината со темнината на човековата подвсест.

Прецизното рушење на раличните скалила на типови на реалност изразени преку високи хроматски температури и композиционалната напрегнатост визави композиционалната смираност ги бележат примарните ликовни иницијации кај делата на Марко Вујисиќ. Просторност постанува материја на формалните просторни конструкции, каде визијата и креацијата пробудуваат една нова форма на репрезентирање на пејсажите и урбаните средини.

Тројцата уметници се членови на ДЛУМ и учестувале на бројни изложби во земјата и во странство.

Изложбата „Асоцијации“ од Росица Лазеска отворена во Прилеп

Синоќа во ликовната галерија на ЦК „Марко Цепенков“во Прилеп беше отворена изложбата „Асоцијации“ од уметницата Росица Лазеска, која се претставува со 29 цртежи. За творештвото на Лазеска говореше Викторија Димеска, историчар на уметност, која посочи дека колажните композиции на Лазеска изобилуваат со интимни сензации и автентични имагинативни форми, облици и знаци – реконструкции на внатрешни, асоцијативни и мисловни процеси.

-Ликовните структури дејствуваат автономно со динамична експресивна можност, креирајќи ја траекторијата на движења на соседните имагинативни ентитети. Делата на уметницата продираат низ процесот на свесниот разум и се врежуваат во меморијата на оној кој ја набљудува композицијата. ...Исклучителноставо творештвото на Лазеска не само што се припишува на нејзината артистичка способност да создаде разнообразен ликовен јазик, туку се темели и на креативната можност да го материјализира и претстави процесот на интроспективно освестување, односно будење на себството. Во суштина, идејата за отелотворување на процесот на создавање или будење на свесноста како најинтимен процес на човековиот ум, преку ликовниот јазик, ја доближува уметницата до обидите за интерпретација на свесноста од страна на современите филозофи – посочи Димеска на отворањето на изложбата на Лазеска.

Росица Лазеска дипломира на Архитектонскиот факултет во Скопје 1986, на ФЛУ Скопје отсек графика во 1992, од кога е и член на ДЛУМ. Во периодот од 1993-1995 работи на изработка на неколку поштански марки. Добитник е на бројни награди, меѓу кои и на Гранд При на 2 - то Интернационално графичко триенале во Александрија, Египет во 1996година. Реализирала повеќе самостојни и групни изложби во земјата и во странство.

- Филозофите од друга страна, кажувале многу со толку малку зборови. Имаме многу да покажеме, а толку малку покажуваме на светот. Во секој минималист се крие една мрзелива личност со големи идеи. Успева да допре до луѓето баш поради тоа заедничко чувство кое го делат. Всушност секогаш поврзаноста на едно дело со набљудувачот е заедничко чувство. Чувство на меланхолија, среќа, вознемиреност. Токму оттука уметноста е субјективна, затоа што авторот е комплексно суштество од збир на сите чувства и емоции кои гледачот ги препознава во себеси. Ги препознава, но не секогаш ги изразува. Сите ние го имаме чувството на мрзеливост, извор од кој доаѓаат изговорите за најголем дел од работите кои сме можеле, а не сме ги направиле, за потенцијалот и идеите кои сме можеле да ги искористиме, а не сме. Како и во животот, и во уметноста прогресот е некогаш поттикнат од уништување и самоуништување. За да биде пеперутката пеперутка, прво мора да е гасеница. Можеби не сме свесни дека понекогаш токму нашата автодеструктивност е само премин кон поголемо ниво на свест, кон нови идеи, кон сосема нов поглед на нештата, на свет кој ни бил пред очи, а сепак невидлив. Во делата се претставени емоционални и егзистенцијални состојби на човек, губење на себеси за повторно пронаоѓање и така во круг, се со цел движење на бесконечниот прогрес – потенцира уметникот.

Методија Јорданоски,завршил ФЛУ во Скопје. Работи како графички дизајнер. Има учествувано во повеќе групни изложби во државата и надвор. Номиниран е финалист на осмиот Интернационален конкурс за студентски плакат, Скопје - Enabled for Disabled .

Изложба „Човек – број“ од Стефан Анчевски

Во Ликовната галерија на ЦК „Марко Цепенков“отворена е изложбата „Човек – број“ од уметникот Стефан Анчевски ( 3.9.- 19.9.2021). Изложбата е поддржана од Министерството за култура.

Уметникот Стефан Анчевски за ликовниот опис на делата со наслов „Човек – број“ вели дека настанале од секојдневието.

-Чекањето на шалтер со бројче во рака е најактуелната форма на нумерирање на луѓето во современиот начин на живеење. Принципот на „земи бројче“ можеби од една страна го олеснува воспоставувањето ред на чекање на шалтери на скоро веќе сите јавни администрации, банки, оператори ит.н. но, од друга страна она „најстрашното“ чекање не е изоставено. Токму тоа е појдовната точка на овој ликовен проект, кој сосема случајно (во тоа бескрајно чекање) почна да се развива за да го анализира човекот како број, поточно да го претвора или само да констатира дека од човековиот идентитет ( единствен матичен број), редниот број во училишниот дневник, бројот на индекс, па се до бројот на чевли, среќен број, број на години, број на шеќер во крвта....... човекот се одредува, т.е. дефинира по случајност на броеви. Меѓутоа, не се работи за констатација, туку за чувство што го добивам секогаш кога ќе се повикам на одреден број – јас се претворам во број или бројот станува „јас“?

Изработените графички решенија се со различни постапки и техники добиени по пат на случајност, без контрола врз една од најконтролираните ликовни техники – графиката. Со одбирањето на ваквата постапка ја надополнив содржината на моите дела – контролирањето и воведувањето ред со броеви на човековото постоење наспроти човековата природа, наспроти она што човекот во својата суштина – е – вели Анчевски.

Стефан Анчевски, дипломирал на Факултетот за ликовни уметности во Скопје при универзитетот „Св. Кирил и Методиј“(2017). Учествува на повеќе групни изложби во земјава и странство и на повеќе ликовни колонии.

Изложба „Позадини“ од Бојана Артиновска Трпческа

Во Ликовната галерија од ЦК „Марко Цепенков“ отворена е изложбата „Позадини“ од Бојана Артиновска Трпческа. ( 6.8 до 24.8.2021)

Посетителите имаа можност да присуствуваат на извонреден уметнички перформанс, односно да се фотографираат со нејзините дела, а кои фотографии понатаму ќе бидат преточени во ново уметничко дело.

Викторија Димеска, историчар на уметност ќе забележи дека уметницата екпериментирајќи со разни сликарски техники и технологија, осознава дека уметничкото и естетското доживување на боите во една сликарска композиција предизвикува илјадници доживувања.

- Љубовта и поврзаноста со портретот како постојан и чест мотив во нејзиниот творечки опус ја охрабруваат да истражува и во полето на фотографијата, користејќи ги подоцна истите фотографии како предлошка за сликани дела или цртеж – вели Димеска.

Уметницата Бојана Артиновска Трпческа вели дека додека ги набљудувала сликите, согледала дека тие преставуваат автономни композиции и идејата за создавање на перформанс (изложба) дошла сама по себе.

-Сакам случајните или намерните минувачи да станат интерактивни учесници и дел од интенцијално дизајниран простор, со цел за момент да се соединат со позадината и да се соочат со себе си, имајќи го на ум сознанието дека ќе бидат фотографирани. Замислата е секој да ја пронајде позадината со која што најмногу се идентификува, односно елементот и просторната димензија со која што се соживува Делата ќе значат продолжување на животот на енергијата која што ја вложувам во нив. Вибрациите ќе продолжат да треперат во секое ново среќавање со делата, со секое ново застанување на разни модели пред платното. Идејта е набљудувачот да постане свесен за сопственото делување и влијание во просторот и времето – вели трпческа.

Отворањето на изложбата беше збогатено со настапите на виолинистката Софија Никоска и солистот Ана Митоска и на актерот Игор Трпчески.

Изложба „19“ од Христина Зафировска

во Ликовната галерија отворена е изложбата “19„ од Христина Зафировска, што е поддржана од Министерството за култура во годишната програма за 2021.(16 7. – 4.8.2021)

Академската сликарка Христина Зафировска, преку својот циклус од 19 дела на тема „Ковид“,на апстрактен и сликовит начин ни го прикажува реалното и невидливото со голо око, поттикнатаод промените на животниот тек, настанати од пандемијата. Целиот серијал од 19 епизоди кои се тесно поврзани меѓу себего интерпретира биолошкиот кружен строеж на вирусот, неговото создавање, виреење, проширување и пренесување.

- Креативните дела од овој циклус се изработени во акрилна техника - мал формат, симболизирајќи ја микроскопската големина на вирусот,кои се надополнети со мали парчиња кои се пробиваат низ површината. Во кружниот, квадратниот и триаголниот простор со мирни потези нанесени се глатки брановидни и испрекинати линии – патот по кој вирусот се движи, а точкастите сегменти иницираат на циркулацијата и ширењето на вирусот. Во секое дело применет е широк опсег на форми со кои авторката ги паралелизираваријациите на микросветот, а таквиот начин на изразување може да се види и во многу претходни нејзини циклуси и изложби....Преку бојата, формата и начинот за визуелно претставување на делата го следиме уметничкиот стил на Зафировска, кој што заслужено може да се категоризира како дел од модернатаапстрактна уметност.. Нејзиниот концентриран фокус покажува кон спремност за експериментирање со нови фантастични облици, кои ќе бидат пандан на фигуративната структура на вирусот кој прерасна во реална закана врз човештвото во 21 век – вели м-р Билјана Галоска за творештвото на Зафировска.

Христина Зафировска работи во полето на сликарството, графичкиот дизајн,мозаикот, ѕидното сликарство, инсталацијата, сценографијата,цртежот, фотографијата и видеото;

Активно учествува на локални и регионални проекти, погранични соработки од областа на културата. Дел е од многубројни проекти, саеми на уметност, симпозиуми, фестивали, работилници, групни претставувања на Балканот, низ Европа и пошироко.