Изложба “Скулптури на новото време 2019“.

Во ликовната галерија е отворена изложбата „Скулптури на новото време“ ( 9.8. 16.8.2019), на која со дела се претставуваат 22 автори, меѓу кои и прилепските Емил Солески, Марјан Стојаноски, Методи Исков, Филип Перески и Давид Атанасоски. Скулптурите се работени во повеќе различни материјали како и во повеќе скулпторски техники.

„Биеналната изложба на скулптури “Скулптури на новото време 2019“ во своето јубилејно десетто издание ја сублимира севкупната идеја на оваа изложба - хетерогеноста и богатството на современиот скулпторски израз во којшто сè е дозволено: во поглед на употребата на материјали со коишто се изработуваат скулптурите но и во однос на пристапот кој варира од класичното разбирање на улогата на скулптурата во просторот до концептуалниот приод со употреба на ready-made материјали, па дури и некои обиди за комбинација на технологијата во служба на изработка на кинетичка скулптура. Ако кон ова се додаде и возраста на авторите којашто варира од најстарите до најмладите генерации и соочувањето на повеќе академски скулпторски школи на едно место, добиваме една збирка на дела вредна за почит и внимание, многу ретка на овие македонски изложбени простори – вели Роберт Цветковски, историчар на уметноста.

Изложба на дела „Уметност, меѓународна група и пријателите“

Во ликовниот салон е отворена изложба на дела „Уметност, меѓународна група и пријателите“, на која се претставуваат 15 уметници. (19.07. до 1.7.2019)
Преку изложбата се обединуваат уметниците , со што се поттикнува меѓусебното пријателство и соработка. Изложени се дела од Светлана Еланцева,(Русија) Светлана Соло,(Русија), Олга Панкина (Русија), Габриеле Смоларз ( Велика Британија), Стефан Хаџи Николов, Новица Трајковски и Душан Коцев (Македонија), Павлина Копано (Бугарија), Светлозар Недев (Бугарија), Гајана Доброволскаја (Русија), Клеменс Бенкун (Кореја), Тодор Шербанеску (Романија), Маргарита Григорова (Бугарија), Алексеј Шеболдаев и Фјодор Сухинин (Русија). 

Изложбата ја отвори Викторија Димеска која која посочи дека преку групата уметници имаат прилика да споделат сегменти од нивната духовна и материјалната култура, јазик, традиција, бидејќи уметноста за нив е средство за меѓусебно разбирање и комуникација.

- Уметничките дела изобилуваат со различни мотиви, пејзажи и градски ведути, реализирани во различни уметнички стилови - реализам, апстрактен пејзажизам, геометриска апстракција, енформел, симболизам, надреализам - рече Димеска на отворањето на изложбата.

Изложба од Александра Богоеска

„Емоции – допир со природата“ од Александра Богоеска , дипломиран скулптор на ФЛУ Скопје е отворена во ликовната галерија ( 5 .7. до 25.7.2019). изложбата ја отвори Викторија Димеска, историчар на уметност, која посочи дека академскиот скулптор Александра Богоеска храбро и сигурно исчекорува во сферата на ликовната уметност. Плодниот творечки опус од скулптури и мозаици, уметникот го надополнил со уметнички сликарски платна.
-Во ликовниот израз на Богоеска се проткајува симболизмот. Посебноста во творештвото на уметникот се согледува во умешноста на пренесувањето на интимните индивидуални, емотивни и психофизички состојби преку различен симболичен јазик. Фигурата во творештвото на Богоеска е најчесто робустна и монументална, додека пак бојата е лирична и експресионистичка. Преку поставувањето на симболите во самата композиција, како што се: јаболкото, лотусот, волкот, пеперутката, цветниот венец уметникот успеал да го доближи и да го соочи набљудувачот со надреалистичната фантастичната, имагинарната и ирационалната страна на човековата свесност. Самите симболи го поттикнуваат разумот да ги одгатнува скриените суштествени пораки, додека пак колоритот со сопствената топлина дава чувство на пријатност, кое го поттикнува, понесува и вовлекува љубопитниот набљудувач во различни мистични витли и јами во сферата на имагинацијата и фантазијата. 
Главен лик-фигура која се проткајува и е присутна во творештвото на Богоевска претставува женскиот акт и портрет. Поради моќноста и силата на емотивната страна на жената, како и нејзината силна развиена интуитивност, сетилност и рационалност, уметникот одлучува портретот и актот на женското тело да биде главен адут, најсилно средство преку кои ќе ја ирази сопствената креативна способност и карактеристиките на сликарството, преку богатата и раскошна палета на бои и линијата - истакна Димеска.
Изложбата на Богоеска и ја честиташе и градоначалникот Илија Јованоски.
Александра Богоеска дипломирала на ФЛУ Скопје оддел скулптура, конзервација и реставрација. Има реализирано групни изложби во Македонија и во странство. Има учествувано на голем број колонии низ земјата и во Србија. Изработува скулптури, мозаици, слики.

„Пејзажни знаци“ од Давид Атанасоски

„Пејзажни знаци“ е првата самостојна изложба на младиот уметник Давид Атанасоски, што е отворена во ликовната галерија (7.06.до 20.06.2019). Изложбата ја отвори историчарот по уметност Викторија Димеска, според која творештвото на Атанасоски претставува резултат на инвентивните скулпторски и сликарски истражувања.

- Процесот на преобразување на сликарските елементи во карактеристични пластични објекти, укажува на развиена сетилна релација меѓу материјалот и креативниот творечки потенцијал на уметникот. Едноставните геометриски конструктивни форми и белези упатуваат на длабоко развиено интуитивно и мисловно разбирање на сликарската и скулпторкскта форма, маса, материјал и простор. Создавајќи сопствен автентичен јазик , Атанасоски формира апстрактно асоцијативни и геометриски форми, поставувајќи ги и распоредувајќи ги хоризонтално, вертикално и дијагонално во просторот на самата конструкција, притоа врамувајќи ги експресивните решенија во т.н. квадратни форми или „касети“ - посочи на отворањето на изложбата Димеска.
Давид Атанасоски во 2018 година заврши Факултет за ликовни уметности во Скопје, отсек вајарство во класата на професор Исмет Рамиќевиќ, со конзервација и реставрација. Досега има реализирано повеќе групни изложби во родниот Прилеп, во Скопје и на почетокот од годинава во Њујорк.

ИЗЛОЖБА „РАЃАЊЕ НА БИТИЕТО“ од АЛЕКСАНДАР ЈАНЕВ - ЈАНЕВ
„Раѓање на битието“ е тематската изложба на скулптури од Александар Јанев отворена во ликовната галерија. ( 17.05. – 31.05.2019 ). На првото претставување пред прилепската јавност уметникот изложува над десетина дела преку кои дава одговор на прашањето Што е живо битие?
Изложбата на скулптури „Раѓање на битието“ од Александар Јанев - Јанев, ја отвори историчарот по уметност Викторија Димеска, која посочи дека творештвото на уметникот е блиско до геометриската апстракција.
- Вајарот при создавањето на скулптурата особено внимава на релејфната структура на материјалот. Тој претпазливо и будно пристапува при обработката на површината и доследно ја претставува елементарната форма на асоцијативнито облик. Со обликувањето на површината на вајарското дело, со помш на различните засечоци, врежувања, како и прицврстувањето на различни метални шајки, скулпторот прави обид да го разоткрие процесот на создавање и автоматско вмрежување во структурен скелт на цврстата материја... Во основа творештвото на Јанев се карактеризира со фигуративен начин на изразување и претставување на природни форми со асоцијативни претстави, стилизирајќи симболични композиции, кои ја хранат илузијата на креирање и создавање на материјата - посочи на отворањето на изложбата Димеска.
Александар Јанев од Гевгелија. дипломирал на УКИМ, Факултет за ликовни уметности Скопје, оддел вајарство со графички дизајн во класата на професор Беди Ибрахим. Работи во Гевгелија како наставник по ликовно образование. Член и претседател е на Друштвото на Ликовни уметници во Гевгелија - ДЛУГ и член на Мултимедиа центар Гевгелија од 2009 година. Учествувал на сите групни изложби на ДЛУГ и Мултимедиа центар, а бил дел од повеќе ликовни колонии.

Изложба на слики од Лилјана Ристеска

Во ликовниот салон на Центарот е отворена изложба на слики од Лилјана Ристеска ( 3.5 до 13.5.2019). Ова е првата самостојна изложба од Лилјана Ристеска, која аматерски се занимава со сликарството.
Изложбата ја отвори Викторија Димеска, историчар на уметност која потенцираше дека станува збор за сликарски платна на кои се претставени мотиви на пејзажи и мртва природа изработени во техники акрил и масло на платно.
- Пејзажите на Ристеска се одликуваат со стабилна конструкција и перспектива. Разбирањето на бојата, играта меѓу сенките и светлината повеќе е од очигледна. Јасно е воочлива нејзината посветеност на обработката на деталите, кои во суштина ја нагласуваат и водат нарацијата на композицијата... Сликарските платна на кои се обработува мотивот на мртва природа изобилуваат со детална и мунициозна изработка на деталите. Личниот потег при сликањето во суштина пидонесува за квалитетот на севкупната наративност. Чувството за наративна поставеност, мунициозната обработка на предметите, чувството за боја, контраст, играта на сенките и светлината, сведочат за извонредниот уметнички талент и набљудувачкото око на уметницата и нејзината предаденост при реализацијата на сопствената артистичка визија -посочи на отворањето на изложбата Димеска.

„DIDYMUS 2019“изложба од Александра Ацеска

„DIDYMUS (Близнакот)“ е тематската изложба од уметницата Александра Ацеска што e отворена во ликовната галерија на ЦК„Марко Цепенков“( 19.04. до 2.5.2019). Ова е втор самостоен проект на авторката, што е инспириран од дваесет и втората изрека во Житието по Тома. Проектот Didymus е продолжение на претходните истражувања на авторката.
-Во Didymus акцентот е на двете спротивни крајности на целината. Оваа тема го привлече моето внимание поради дуалистички светоглед како перспектива, кој е делумно оформен од влијанијата на поднебјето (идеологија, религија) и делумно е во природата на мојот карактер. Од тука и насловот на изложбата, Didymus, што во превод значи Близнак (еврејски. תאומא; грчки. Διδυμος, Томас или Близнакот) - вели Александра Ацеска, потецнирајќи дека во изложбата пробала да ја трансформира галеријата и да „изложи“ атмосфера и целина.
Според неа во просторот посетителите се соочени со атмосфера која може да ја перцепираат со сите сетила – визуелно, аудитивно, преку мирис, вкус и допир.. Изложени се објекти, инсталации, фотографии, суминагаши печати, цртежи, слика и аудио композиција. Покрај ликовните дела просторот го оформуваат и суптилни елементи. Мирисот, музиката, светлината од свеќите и течностите, го вовлекуваат посетителот во една мистична атмосфера, каква што прилега на симболите искористени во ликовниот јазик.

Изложба на м-р Марија Светиева

Изложбата на академскиот сликар м-р Марија Светиева ја отвори Викторија Димеска, историчар на уметност која посочи дека за авторката реалниот свет претставува побуда за изразување на сопствената интерпретација и животно уверување. (12.04.до 1.5.2019)

„ Со илустративното изразување, уметникот ја симплифицира формата, односно ги редуцира деталите, со цел да стигне до нивната суштина. односно знаковност и симболизам. Преку употребата на примарните бои - црвената, жолтата, сината, како и нивните комплементарни бои, во сопствените чисти форми, Светиева нагласува и потсетува дека „едноставноста е клучна нота за елеганцијата“. Хармонизирајќи ја играта на симболите, ритамот, должината и карактерот на потегот, како и соодветната дебелина на боениот слој, таа создава едноставен и ритмичен свет“ - посочи на отворањето на изложбата Димеска, историчар на уметност..
Марија Светиева дипломирала на Факултетот за ликовни уметници во Скопје, на отсек графика со графички дизајн, кај професор Димитар Малиданов. Член е на ДЛУМ, реализирала стипендија во Болоња, член е на Интернационалното здружение на графичари во Рим. Во 2010 магистрира на отсек графика при Факултетот за ликовни уметности кај професорот Димитар Малиданов. Реализирала бројни самостојни изложби низ Македонија, во Хрватска, Србија, Косово, Чешка, Италија, Швајцарија, Шведска, Германија, како и повеќе групни поставки, а била дел од колонии.
За нејзиното творештво е добитник на повеќе награди. 

Во ликовната галерија од ЦК „Марко Цепенков“ е отворена изложба на слики од м-р Владимир Темков. (28.3. – 10.4.2019)
Уметникот пред прилепчани се претставува со 28 слики.
Изложбата ја отворија Викторија Димеска, историчар по уметност и Горан Боев, уметник.
Според Димеска, уметничкиот творечки опус на академскиот сликар Владимир Темков, кој претставува резултат на долгогодишната продукција и успешна реализација, се вбројува и го збогатува современото уметничко творештво на македонската сликарска сцена.
„ Набљудувајќи го уметничкото творештво посетителот може да забележи неколку клучни белези за творештвото на сликарот – доминантната линија, подреденоста на бојата во однос на линијата, ритмичното повторување на формите во композицијата и употребата на т.н. метафорични изрази преку самите форми. Линијата ја гради и предводи наративноста и структурата на приказната во композицијата, додека пак, примарните бои во нивната чиста форма го мистифицираат амбиентот и придонесуваат во создавањето и обликувањето на мислата“ посочи Димеска на отворањето на изложбата.
Според Горан Боев сликарството наТемков како правец е изнедрено од надреализмот и од сликарството на големите уметници како Миро и Пикасо.
„ Меѓу непредметните форми во сликите пронаоѓаме мотив од природата. Тоа е обликот на птицата. Таа во нив , како метафора може да биде прочитана во повеќе насоки – живот, стремеж, сеќавање, движење во еден миг, желба да се постигнат височините. Темков е емотивно врзан за неа. Во неговото творештво птицата останува сон и емоција“.
Темков реализирал над 60 самостојни изложби, повеќе групни, учествувал на колонии и остварил студиски престои во Париз Франција и во САД.

Изложба на дела од Струмичката ликовна колонија

Во ликовната галерија од ЦК„Марко Цепенков“отворена е изложба на дела од 55 –та Струмичка ликовна колонија.( 5.3.2019 – 20.3.2019).

Изложбата ја отвори Ивана Атанасоска, етнолог и антрополог, која посочи дека е пријатно ликовно доживување.

- Во 55 тата Струмичка ликовна колонија учество зеле 16 ликовни уметници од Македонија и од странство кои уметничката инспирација ја црпеле од Струмица и околината за да ги создадат овие 23 слики и два мозаици. Со тоа е зголемен и веќе постоечкиот фонд од приближно 2200 уметнички дела кои се создадени од околу 800 уметници од целиот свет - посочи Атанасоска на отворањето на изложбата.