Објекти  од Јулија Манојлоска

Изложба на објекти од Јулија Манојлоска e отворена во ликовната галерија од ЦК„Марко Цепенков“.(27.10 – 9.10.2017). Љубителите на ликовната уметност имаат можност да проследат објекти кои се транспарентни, но и кршливи, кои го ограничуваат просторот во којшто нешто се  случува. Нивната функција е да бидат аспекти на набљудување на поврзување на најчистите бои, како ослободена светлина,а  пред се ликовна сензација.Изложбата ја отвори уметницата Билјана Бинчев.

Манојловска има завршено ФЛУ во Скопје во класата на проф. Јован Шумковски. Досега реализирала повеќе групни изложби и проекти, а била дел од ликовни колонии. Работи како професор по ликовна уметност во приватната гимназија Алгоритам во Скопје.

Изложба „Емотивна геомтерија“ од Никола Смилков

„Емотивна геометрија“ е тематската изложба од скулптури од Никола Смилков, отворена во во ликовната галерија.(10.10 – 26.10.2017). Уметникот нуди мали монументи на емотивни реминисценции, чија геометрија е емотивна, длабока и персонализирана.

-Делата од овој реномиран макеоднски уметник не се ладни, стерилни геометриски форми, ами јасно изразени антропоморфни, дури и персонализирани фигурации. Со тоа, тие нималку не се апстрактни во својата содржина, затоа што длабоко проникнуваат во суштината и во себе носат јасна емоција - реминисценција на едно детство. Изразот на Смилков е негово оргинално откритие во истражувањата на скулптурата. Токму ритамот што произлегува од ова двојство и ја дава на скулптурите на Смилков онаа монументалност која е уште една типична карактеристика на неговиот израз – вели филозофот Трајче Стојанов за неговото творештво.

Смилков е професор на Универзитетот „Гоце Делчев“ во Штип. Учесник е на бројни ликовни колонии, а реализирал повеќе самостојни и групни изложби во земјата и во странство. Добитник е на повеќе награди и изработил монументални творби.

Изложба на дела од Јордан Ефремов

Изложба на дела од Јордан Ефремов e отворена вечерва во ликовниот салон на ЦК„Марко Цепенков“.Штипскиот уметник пред прилечани се претставuva со дела кои се со високо занаетчиство и естетска мерка.

Отворајќи ја изложбата Елизабета Дерменкоска – Цефи, историчар по уметност со археологија, ќе забележи дека Ефремов несебично ги распослал овие платна, веродостојно отсликувајќи ја својата душа, ја допрел секоја „сечија, а вечерва овде и нашата. Како вистински мајстор на својот занает, фотографски ја прикажува анатомијата на човечкото тело, но исто толку успешно ја доловува и состојбата на умот, во дадениот миг“.

Ефремов завршил ФЛУ во Сkопје, сликарски оддел во класата на Душан Перчинков, каде и магистрирал кај професорот Антони Мазневски. Реализирал самостојни изложби во Куманово, Кавадарци, Велес, Скопје, Штип, а бил дел и од групни претставувања и учесник на колонии. Професор е на Универзитетот во Штип.

Изложбата „Национална митологија“ од Џелил Руфати

„Национална митологија„ е тематската изложба од уметникот Џелил Руфати што e отворена во ликовната галерија (22.9.6.10.2017). Руфати за првпат пред прилепчани се претставuva со творби кои имаат интересни уметнички знаци.

- Во ова уметничко патешествие Џелил остава уметнички траги и кали карактери и форми кои резултираат со разни нивоа на претворања од имиџ на уметник во уметнички знаци – фигури, структури, ритми, соодноси на детали и форми. Така, од надворешните знаци, добиени со помош на длета и чекан, уметникот создава уметничка идеја за фигурата, создавајќи историско културно табло на стражарот, војникот или на херојот, каде што се отелотворува херојскиот гест со хуманистичката намера за проширување на круговите на човековата слобода. Освен видливите материјални елементи, во делата на Џелил, ја препознавам и метафората, која поинаку се нарекува невидлива форма, или уметничка идеја, со која тој мошне успешно ги поврзува елементите на уметничкото изразување, формирано од целината на мислите, чувствата и гледиштата вели за неговото творештво вели Кадри Метај, филозоф – естетичар.

Џелил Руфити има завршено Ликовна академија на вајарскиот отсек во Приштина во класата на проф. Агим Чавдербаша, каде и магистрирал. Во почетокот работел како професор во гостиварската гимназија, а сега е професор на Ликовниот факултет во Тетовскиот универзитет по предметите вајарство. Реализирал самостојни изложби во Гостивар, Тетово, Дебар, Приштина, Париз, Њујорк, Скопје, Хамбург, како и повеќе групни. Бил учесник на повеќе колонии и семинари. Член е на ДРАУДАКУМ (Здружение на ликовни уметници на Македонија), реализирал повеќе уметнички остварувања, а добитник е и на повеќе награди.

Проект „ДЕЛ ОД МЕНЕ“од Ферди Булут и Дарко Талески

Изложбата „Дел од мене“ (фотографии и кратки видео записи дел од видео перформанс) од прилепските уметници Дарко Талески и Ферди Булут е во ликовната галерија.(15.9. – 22.9.2017).

"КАКО МЕ ГЛЕДАШ МЕНЕ ПОКАЖУВА КОЈ СИ ТИ, КАКО ЈАС РЕАГИРАМ НА ТЕБЕ ПОКАЖУВА КОЈ СУМ ЈАС„е дел од описот на изложбата на двајцата ликовни уметници, кои живееат во пелагонискиот регион на Македонија каде што сеуште како една од доминатните култури за финансиски приход е тутунот. Од овој регион потекнуваат голем број на видни уметници од сите области, чии што мотив често бил тутунот. Ферди потекнува од рурална средина директно инволвиран од најрано детство во обработката на тутунот, Дарко од урбана средина, кој никогаш не бил директно вклучен во обработка на тутун, но неговото опкружување му дава можност да се запознае со тој процес. Едниот е од турска, а другиот од македонска националност, што уште повеќе го збогатува нивното заедничко творештво.

Во проектот „Дел од мене“ како основен материјал е земена саргијата (груба ткаенина изработена од коноп која се користи за вкалапување на исушениот тутун). Саргијата ја носи миризбата на обработениот тутун која што миризба се впива на истиот начин како што миризбата се лепи за тутуноберачите.

Ферди ја користи саргијата како втора кожа. Кожата е еден вид меморија на животот. Ферди уште од најрана возраст се соочува со маката што ја носи тутунот. Преку фотографиите и кратките видео записи дел од видео перформансот, тој е обвиен во саргија како негова втора кожа. Стиснат помеѓу мирисот и тежината во другите фотографии т.е. другиот дел од перформансот Ферди се обидува да се ослободи од таа тежина. Колку и да е силно и вистинско тоа одделување, остава свои траги. Тоа е причина за дел од фотографиите на перформансот да се види втора кожа, овој пат проѕирна (проѕирна фолија) како симбол на трагите кои остануваат врз личноста од социјалните и опшествените случувања во кои расне, созрева, живее и твори. Тешките услови за живот неминовно допринесува голем број на луѓе кои се соочуваат со тежината на тутунообработката да бараат можност да избегаат т.е се одделат од миризбата на тутунот и од стегите на саргијата.

Дарко во последните двегодини експериментира со состојбата на неговата кожа (demographyт.е.цртање на кожа) како медиум за уметничко изразување. Тој вели „кожата го покрива телото која што истовремено има улога да не заштите од другите, но и да не прикаже пред другите. Дел од книгата „Мислење преку кожата“ од Сара Ахмет и Џеки Сатјси е следниот текст: мислата не се одразува само на телото како изгубен објект на мислата, туку на целосната слика за нас самите, на начинот на постоењето - со, и постоењето - за, каде што еден допир е допир на другите. Проучувајќи го ова јас разбрав дека мојата личност е се рефлектира преку мојата кожа“.

Изложбата на Дарко и Ферди е дел од програмата Нов културен бран, што ја релизира Министерството за култура.

Изложбата „Асоцијативни пејзажи“ на Анета Ивановска Симјановска

 „Асоцијативни пејзажи“ е тематската изложба на дела од Анета Ивановска Симјановска што e отворена ( 11.8.-25.8 2017) во ликовната галерија на ЦК„Марко Цепенков“. Уметницата се претставува со дела композиции кои изобилуваат со драматика, динамичност и импулсивност преточени во специфичен ликовен ракописи што влијае врз емотивниот сензибилитет кај гледачот будејќи ги рационалните сомнежи и претпоставки. Творбите пулсираат со див ритам и енергија, одушевуваат со бесконечни креативни замисли исполнети со многубројни детали на величенствената нефигуративност. Не се создадени според природата, туку креирани заедно со неа. „Асоцијативните пејзажи“ откриваат актуелен момент на една универзална визуелна медитација што ги надраснува границите на сопствената стварност претворајќи се во своевидна виртуелна реалност.

Анета Ивановска Симјановска има завршено ФЛУ во Скопје, член е на ДЛУМ и на ДЛУБ. Реализирала повеќе самостојни изложби во земјата, била учесник на групни изложби и ликовни колонии, а за нејзиното творештво е добитник на повеќе награди.

Изложбата “Живот во бои” од Андријана Мациев

Изложбата „Живот во бои 2“ од уметницата Андријана Мациев е отворена (28.7.-11.8.2017) во галеријата „Борко Лазески„,На втората изложба пред прилепчани Мациев се претставува со 15 слики кои делуваат како да се продуцирани битово, со експресионистички манир и апстракција, приближувајќи се кон претстава на неопипливите нематеријални нешта: внатрешната состојба на духот и душата, виталноста, животниот импулс, љубовта...

- Писмото на Мациев е препознатливо по силниот и контрастен колорит кој блеска со оптимизам и животна радост. Забележлива е тематската широчина во делата, која се должи на основните чисти ликовни вредности - линија, боја, композиција. Во ова множество на бои и форми, се испреплетуваат кругови во комбинација на геометриски линии и елементи, во различни големини и бои, создавајќи ритмичност на насликаната површина. Наносите на бои се изведени преку широк потег на четката, надополнети се со линеарни интервенции како контрапункт на основата, при што може да се заклучи дека овој начин е избран како патека за дефинирање на избликот на енергијата која е претставена на платната – ќе забележи Елена Иванова за творештвото на уметницата.

Мациев, графичар по ликовна определба, дипломирана на ФЛУ во класата на проф. Димитар Малиданов, реализирала бројни самостојни изложби, а учествувала и на групни, како и на ликовни колонии во земјата и во странство. За нејзиното творештво добитник е на бројни награди и признанија. 

Изложбата „Патување“ од Кирил Гегоски пред сограѓаните

„Патување“ е тематската изложба од уметникот Кирил Гегоски што е отворена (10.7 2017....) во галеријата„Борко Лазески“ во ЦК„Марко Цепенков“. Пред љубителите на ликовната уметност во својот град Геоски се претстави со 30 цртежи создадени изминатиот период.

Гегоски, кој има остварено студиски патувања во Париз, Венеција, Атина, досега реализирал над 50 самостојни изложби во земјата и во странство, како и бројни групни изложби, а добитник е на повеќе награди  за цртеж и за графика.

Изложба „4 Ж“ од Александра Петкова Гианели во Прилеп

Тематската изложба „4 Ж“ од уметницата Александра Петкова Гианели e отворена во галеријата од ЦК„Марко Цепенков“. Прилепчани имаат можност да ги проследат делата од најновиот циклус на уметницата – слики  акрил и мешани медиуми насловена „4Ж“ ( жена, желба, жиг и живот) преку кои и е воочлива визуелно естетската привлечност. Низ елегантните и раздвижени женски фигури се истражуваат и вообличуваат модалитетите на природата, потенцијалот, плодноста и потребата на биолошко и индивидуално рамниште за ликот...

-Таквите женски ликови кои делуваат освестено и будно, со широко отворени очи и јасно насочен поглед, се сопоставени со мистериозни и дистанцирани машки фигури со животински симболи на мажественост, поблиски до мечти и соништа отколку до вистински луѓе, потенцирајќи го просторот помеѓу како поле на неоствареност но и потенцијал. Едемската вегетативна изобилна позадина дава живост и виталност, дополнувајќи ја и потенцирајќи ја идејата за женскиот принцип на живототворна сила, дотолку што флуидните женски тела ги претпоставуваат сите психофизиолошки димензии од сексуалната, преку приемчивоста, до мајчинската, заштитнички колку и што се ранливи вели авторката.

Таа е дипломиран вајар,со подотсек рачна изработка на хартија при ФЛУ Скопје. Во 1999 е добитник на прва награда “Јустинијанова Порта”.  Имала изложби во Бугарија, Грција, групни  низ земјата, во Македонија, Грција, Бугарија, Романија, Италија, Турција, Кина. Од 2012  до денес живее  и работи во Република Кина, каде има остварено три самостојни изложби “Луѓе на сонцето 1” , “Луѓе на сонцето 2 “и последната од која дел може да видите и во градов.