Премиера - МАЧОРОТ ВО ЧИЗМИ - Недела 22,12,2013 во 12 часот, театар Војдан Чернодрински

Премиерно прикажана "Швејк во втората светска војна"
На 25 октомври 2013 во театарот "Војдан Чернодрински" премиерно беше прикажана претставата "Швејк во втората светска војна" во режија на Мартин Кочовски. Претставата е работена по текст од Б.Брехт, по мотиви на Хашек. Преводот е на Благоја Ивчески.
- Прашањата кои ги поставуваме се како човештвото не успеа да се спаси од тиранијата во неколкуте документирани милениуми, зошто човекот не собра доволно сила да ги надмине тие проблеми, зошто тиранијата се уште ја има? Претставата има неколку слоеви - историјата на фашизмот низ вековите, љубовната приказна меѓу идеалистот и материјалистот и прашањето за секој уметник - Дали уметноста може да го спаси светот од тиранија? Претставата удира силно, а публиката се надевам ќе реагира на овој театарски чин - вели режисерот Кочовски, кој по трет пат Брехт го поставува на прилепската сцена.
Актерите задоволни од истражувачкиот процес во претставата.

Премиера - Петок 25.10.2013 во 20.00 часот

Премиера на комедијата ,,Три варијации на една тема,,

,,Три варијации на една тема,, по текст и во режија на Коле Ангеловски, е третата премиера на театарот,,Војдан Чернодрински,, годинава.

- Се работи за текст со три варијации на една иста тема. Првиот дел е ,,Викендичка,, вториот ,,Три ипол милјарди жени,, и третиот ,,По јолукот надолу,,. Урнебесна комедија на приказни од секојдневието,  во која публиката ќе ужива - вели режисерот Ангеловски.

Премиерно куклената претстава Калифот Штрк

На 21 април 2013 Театарот ,,Војдан Чернодрински, премиерно ја прикажа куклената претстава ,,Калифот Штрк,, од Вилхелм Хауф, во режија на Дарко Ковачовски.  Претставата е со кукли - марионетки, која за првпат од ваков вид се поставува во земјата.

- Актерите заедно со композиторот ги оживуваат куклите, кои со нивниот живот на сцена ја раскажуваат приказната за едно дете кое треба да порасне. Калифот Штрк е претстава за спознавањето и одговорноста - вели Ковачовски, потенцирајќи дека текстот е епски материјал - приказна на Вилхелм Хауф, романтичар кој живеел во 1848 во Германија, а за кој биле интересни темите од Блискиот исток, односно Ориентот.

Премиерно прикажана претставата,, Сонот на Цепенко,,

Театарот,,Војдан Чернодрински,, на 2.2.2013, премиерно ја изведе  претставата ,,Сонот на Цепенко,, (кореодрама)  во режија на Кирил Петрески.

Режисерот Петрески ја подготви адаптацијата на текстовите на Марко Цепенков.

-Претставата се вика Сонот на Цепенков затоа што е замислена да се случува во еден замислен Свет/Сон на авторот, во еден бесконечен циклус на спирала и никогаш да не завршува. Главната приказна во претставата е приказната за Силјан Штркот, затоа што таа претставува камен -темелник во делото на Марко Цепенков. Претставата е само капка од морето на неговото творештво, а приказната ја раскажуваме преку колективна игра, музика и танц - вели режисерот Петрески.

Во претставата играат:

Игор Трпче, Даниела Иваноска, Зоран Иваноски, Никола Настоски, Јасмина Мицовска - Станкоска, Александар Тодески, Димитар Црцороски, Марија Спиркоска - Илиеска,  и Катерина Чакмакоска.

Кореографија: Кире Миладиноски

Сценографијата на Зоран Николовски,

Костимографија: Даниела Настоска

Музика :  групата  Чалгија Саунд Систем.