Изложба на Агрон Салиу
Во ликовната галерија од ЦК „Марко Цепенков“ отворена е изложба на дела од уметникот Агрон Салиу, кој за првпат се претставува пред прилепската публика со портрети. (10 – 17.5.2018).
Изложбата ја отвори историчарот по уметност Викторија Димеска која рече дека творештвото на Салиу изобилува со портрети, чија што улога не претставува единствено епигонско отсликување на моделот кој позира.
– Покрај што се забележува неговата тенденција и природна наклонетост кон анатомска прецизност, сепак на површина испливува емоционалниот набој на портретираниот лик. Пред се, неговиот интерес е сетилната интепретација и нејзината манифестација преку изразот и експресијата на човековиот образ. Тој студиозен пристап посетителот може да го воочи во портретот на старец, каде што транспаретен е силниот гест со цел да се открие т.н. „сложен фатализам на човечкиот живот…. Според својот уметнички израз и досегашниот сликарски опус, творештвото на Салиу припаѓа на експресионизмот“ – посочи Димеска.
Уметникот дипломирал на ФЛУ на Тетовскиот универзитет. Реализирал бројни самостојни изложби во земјата и во странство, како и групни, а бил дел од повеќе проекти од областа на културата.
